日不落的騎呢啡 之 處男作上映
日不落的騎呢啡 之 處男作上映

2018年兒童節我接左一個job叫我去做路人甲。其實要做咩都唔知,反正有錢收就去了!拍攝地點係倫敦市中心Somerset House。Somerset House 係一座藝術館,由於建築物歷史悠久兼美感十足,這棟喬治亞式建築每年都舉辦大大小小的藝術展覽。加上座落在泰晤士河河邊,是不少遊客的打卡位。講完景點講番拍戲,點樣化妝換衫嗰啲唔講啦!一入「片場」就發現劇組幾十人基本上係封左Somerset House中間個廣場,擺左兩支三層樓高的大光燈以及十幾個臨時帳幕。有啲擺器材、擺餐飲以及俾員工休息。導演同一眾副導演逐個走埋黎同你握手介紹自己,多謝你黎,仲問你想飲啲咩!叫人拎黎俾你!

導演話俾我地知要做咩嘅時候,已經有一team人係地下種幾支假嘅50年代點火嗰啲街燈,另一team人就係地下灑水扮落過雨,第三team人就負責周圍噴煙扮有霧。呢場戲演員究竟有幾多個?有四個,我同埋我嘅螢幕女友,一個的士司機同埋一個差佬。成場戲講我地兩個蛋散就係要翹住手扮拍拖,由街頭行一分鐘到街尾,中途的士會迎面駛過,駛過之後向對面馬路嘅警察點下頭。

飲完講完就埋位!一時我企右邊、一時遲啲開始行、一時早啲開始行、一時係後少少嘅位置開始行、一時行慢啲、一時駕的士快左、一時差佬行得慢左、一時噠地乾左、一時唔夠煙霧、一時要換個拍攝角度、一時影到個膠水樽、一時太光、一時換個鏡頭……中間服裝又會走埋黎整理下你件衫,睇下頂帽帶得正唔正。化妝部就同「女友」補妝。之後又去下廁所,又再飲下野。如是者行左超過30次,一拍就拍左3個鐘,呢條一分鐘的街行到由唔識呢個鬼妹到吹水吹到佢家宅係邊屋企做咩生意都講埋俾我聽。抄牌就少不免!

留言

請留下你的意見
請輸入你的名字